Montag, 17. August 2009

zum 94. Geburtstag.......


Hüt chönnt üse Vater - dr Hans Robert Wüthrich - si 94. Geburtstag fyre, we vor 24 Jahr sis guete Härz nid eifach uf z'Mau hät ufghört schla... Das Foto hani denn i de Ferie, fasch genau es Jahr vor sym Tod gmacht. Mir hocke da ir Gondle wo vo Saasgrund (VS) uf ds Hoh-Saas ufe geit.

Mi tüecht's mängisch fasch nid müglech, dass scho sone längi Zyt verby isch sider dessi. Gwüssi Sache u Erinnerige a mi Vater si no so presänt, aus wärs würklech grad erscht passiert - u äbe glych isch scho sone längi Zyt drzwüsche. I ertappe mi öppe no, dass weni öppis vernime wo dr Vater o drann beteiliget isch gsy oder drvo gwüsst het, das i ihm das wett verzeue.... Oder o weni i Gägende chume wo mer früecher aube viu si gsy - im Wallis, im Nufenen- oder Grimsugebiet wo mer aube Heiti abgläse hei , em Hallwilersee bi mim Götti, etc., de chöme au die vile schöne Erinnerige ufe.
I dankbar für au das. O weni scho chly ne eutere Vater ha gha - är isch denn 53-jährig gsy woni uf d'Wäut bi cho - u mängs nid ha dörfe, so wie villecht mini glychautrige Gschpähnli. So bini hüt doch sehr froh um aus, wonär u mi Mueter zäme mir hei mit ufe Wäg gäh. I wär i gwüssne Sache hüt äuä nid so stabil, ohni ihri Erziehig! Weni so üsserlich nid viu vom Vater mitübercho ha, so hani umso meh vo sine innere Wärte chönne profitiere. Es isch ds Singe, d' Fröid ar Musig genereu , d' Fröid a de Mönsche u o d Chraft u dr Wiue vom ,"Weme A seit, de seit me o B!" Är het mi o d'Fründlechkeit glehrt mit em Hiwys, sich säuber nid so wichtig z'näh u lieber im Hingergrund z'Wärche - das de drfür aber guet! Gärn dänkeni o dra zrügg weni aube zu ihm ids Gschäft, i d'Schlosserei (är isch dert Schlosserei-Chef gsy) ha dörfe gah, umer när de aube nam Fyrabe no zäme hei "Zinnsoldate" gosse. Das isch aube es Erläbnis gsy für mi. Är isch stränge gsy ir Erziehig u het aube o rächt chönne bauge! Aber ds Schöne isch gsy, füf Minute speter ischer ume dr liebscht u bescht Pap gsy woni mer nume hät chönne wünsche.

Es tuuret mi no hüt, dass mer nid meh Zyt zäme hei chönne verbringe. Woni du so zum junge Maa häregwachse bi une äbe geng wie meh nötig hät gha, het öpper angers es Machtwort gred u mer ne när mit 17 zähni eifach furtgno! I ha mi nid chönne verabschiede - es isch eifach e so gsy, Punkt! Das isch e gwautige Yschnitt gsy für mi. U o ds Biud wo dr "Wotschi", üse Cocker Spaniel, womer denn hei gha, praktisch 3 Tag immer ufem Bett vo mim Vater gläge isch, geit mer nid so schnäu zum Chopf us. E ganz e grossi Hiuf u Stützi isch du denn mi Mueter gsy. Dank ihre hani mi o ume chönne uffah u sicher o im Sinn vom Vater, mis Läbe wyter z'meischtere.

Es tuet mer hüt aube fasch chly weh, weni mängisch gseh oder ghöre, wie reschpäktlos hütigi gwüssi Jugendlechi öppe vo ihrne Eutere rede.. I gloube - si hei nid begriffe was es heisst Eutere z'ha! Uf ne Wäg bini aber o froh, dass miner Eutere die hütigi Zyt nümme müesse miterläbe. Chieme si äch mit au dene Veränderige z'Gang? I weiss nid. Ds Schicksau hets so bestumme u mir wei nid hadere. Nei, i bi dankbar für aus, womer zäme gha hei u was ig vo ihne ha mit uf e Läbeswäg übercho. U drum gedänkeni hüt mit grosser Fröid, aber o chly mit Wehmuet em Pap sym 94. Geburtstag!

Sonntag, 16. August 2009

E Sunntigsspaziergang....


Hüt, bi däm wunderschöne Sunnetag, hani nid chönne dinne hocke. I ha eifach chly use wöue. Wiu mer na dr Operation ds Luufe sowiso guet täti, hani bschlosse, zu mim Göttibueb übere z'luufe. 40 Minute bini so gmüetlech i Richtig Arni u när z'dürfüre gägem Roth täselet. Es het mi schono chly bruucht. Die Bewegige im Buch hei mängisch bau chly gschmärzt - aber i ha uf Zäng bisse u es isch guet usecho. Vorauem isch es e gueti Therapie gsy, wo hiuft das es geng wie besser geit.
So ab auem Luufe gseht me haut de scho viu me, aus weme mit em Outo umenang pfuuret. U es schmöckt aube o no fein, weme so dür d'Fäuder us joggelet oder a grosse Houzbigine verby chunnt. I bi uf jedefau froh gsy, hani das gmacht!

Bime ne feine Ässe vom Grill hei mers gwüss luschtig u gmüetlech gha u mir hei ono chly zäme chönne spiele - das isch aube bsungers schön. Nach däm schöne Namitag bini när ume dr glych Wäg i Richtig vo dr Grippele gwajaschiert. Da hani bim aaluufe scho bau so chly öppis wie Muskukater gschpürt - es isch du bis dahiime aber ume aus versurret gsy. Zfriede dahiime aacho hani no i Garte gugget u gseh wie d'Sunneblueme strahlet u im Hingergrund üsi Schwizerfahne fäcklet. Das hani du no grad müesse föttele.

Uf dr Loube hani när no chönne d Aabesunne gniesse u dr Sunntig so la usplampe... Es isch wiederume e schöne Tag gsy u hoffe mer, es gäb no es paar settig......

Samstag, 15. August 2009

Spinnele-Netz

Eigentlech isch es ja nid grad so öppis appetitlechs, sone Spinnele. I mues ehrlech säge, dass i o chly dr Gruuse ha vor dene Tierli. Im Momänt hei si ja grad ume Hochsaison u mache überau ihri Kunschtwärch vo Spinnele-Netz. Das wiederume fingeni de wunderschön u o faszinierend. Die Spinnele si nämlech wahri Künschtler u Akkrobate, weme so gseht wie u wo si ihri Fangnetz aalege. Bi mir hets ganz viu vo dene Netzli u gedudig hocket d'Spinnele uf dr Luur, bis sech irgend es angers Insekt im Netz verfaht. De geits blitzschnäu u verby isch dr Spuk.

Dr Adolf Stähli het im Liedli "Chlyni Wunder" ir dritte Strophe so träffend gschriebe:



"Es Netzli ir Sunne, chly Biecht isch no dra, wär settigs cha wäbe mues ds Handwärch verstah! I luege u stuune. Kei Fade verchehrt! Wo het äch das Spinnli das Wäbe o glehrt?"



Die Wort bringes ufe Punkt, was fürne Künschtlere d'Spinnele doch isch. U genau das macht se doch ob auem "Gruuse" wiederum zumene ganz spezieue u einzigartige Tierli. U Vorteile häts natürlech o, denn sie würd üs ja vo dene viele läschtige Flöige befreie. Aber mängisch hani ds Gfüehu, dass die cheibe Flöige dr Pögg o scho gschmöckt hei u die schöne Netzli gschickt umflüge.... Aber so gäge Winter zue, verschwinde de die Netzli samt de Ersteller ume u o vo de Flöige heimer när ume Rueh. Drum freue mir üs itze no a dene "chlyne Wunder" we si so vor üs ir Sunne strahle.....

Sonntag, 9. August 2009

Dankbar......

Dankbar u glücklech hockeni itze ume hinger mim PC u schribe e nöie Bytrag i mim Blog. Getreu em Motto - Aller guten Dinge sind drei! - hani mini dritti Operation hinger mi chönne bringe u bi itze ufem Wäg vor Genesung. I gibes gärn zue, dass mir die Operation chly Angscht het gmacht. Angscht vorem Ygriff säuber hani zwar nie gha, es isch meh gsy, öbs äch dasmau grad uf Aahieb guet chunnt? I ha ja scho gwüsst, dass mi e hervorragende Chirurg u nes professionells Team behandlet, auso mues das ja guet usecho. U glych - e chlyni Angscht isch haut blibe....

I dr Spitauzyt hani wiederume chly Zyt gha nachez'däiche. Isch sech jede Mönsch eigentenlech bis i ds Innerschte iche bewusst, was für nes choschtbars Guet ds Läbe isch? Isch sech der glych Mönsch o bewusst, dass das woner hüt tagtäglech u ohni Yschränkig macht, aus angere aus säubschtverständlech isch? Weni die hütigi Situation so gschoue, bi mer da nid so sicher. Uf jedefau hani nach däm Buch-Ygriff z'gspüre übercho, dass nid grad aus wieder so uf Aahieb so geit wie vorhär. O wes chlyn Sache sy - es isch nümme glych dr Momänt.

Was für ne riese Sach mues da i mir inne abloufe, we mi Körper dä Ygriff vo usse, jitze tuet verarbeite? Die ganzi Wundheilig vo innere u üssere Narbe zmache, z'luege das dr Chreislouf u ds Schnufe ume funktioniert, z'mache das aus ume dert düregeit wos mues u die Gfäss, Muskle ihri Arbeit ume ufnäme. Weme da so drüber nachedänkt, wirds eim fasch chly gschmuech u es wird eim bewusst, was für nes Wunderwärch dr Mönsch doch eigentlech isch! Mi mues dr Körper natürlech o ungerstütze i däme ihm aktiv mit Üebige hiuft, die Arbeit chönne z'verrichte.

Weme Gsundheit het, oder se nacheme Ygriff de ume überchunnt, so wie ig, de sött eim d'Dankbarkeit für das koschtbare Gschänk immer presänt sy. Es sött eim häufe, agäblech grossi Problem z'relativiere u o drfür sorge ume chly ufe Bode vor Realität zrugg z'cho.Vili Problem u ds meischte Gchätsch isch husgmacht u gröschteteil lächerlech. I gloube dörfe z'säge, erscht we d'Gsundheit streikt oder aagschlage isch, de gits ächti Problem.

I bi em Chefarzt Chirurgie u sim Team, sowie em ganze Pflegepersonal (4. OG) vom Spital, uf jedefau für ihres Engagement u ihri fürsorglechi Betreuig, vo ganzem Härze dankbar. Si heis ermüglechet, das i dä choschtbar Wärt "Gsundheit" wieder ha zrüggübercho, u mis Läbe itze vou darf gniesse!

Danke viumau!