Traumland.......

Weisst du noch als ich klein war, ....... so faht das wunderschöne Lied a, wo vom Heintje super interpretiert wird. I ha dä Fium - wo das drinne vorchunnt - scho es paarmau gseh u i luegene immer gärn wieder. Die Szene, wo dr Heintje am Schribtisch im Chäuer unger das Liedli singt, geit mer jedesmau unger d'Hut. Sowieso isch das, wo dr Heintje i sine Jugendjahr gleischtet het, i mine Ouge bis hüt unerreicht!

I ha das Liedli zuefäuig bim Surfe wiederentdeckt u bi sehr froh da drüber. Aber loset doch säuber einisch ine u biudet nech öies eigete Urteil....

Unger däm Link findet dir es Video

http://www.youtube.com/watch?v=zoKu8EOKqM8

I wünsche nech viue Vergnüege

Es isch Wiehnachte...........

Scho wieder isch ds Jahr am fertig mache u d'Wiehnachte steit vor dr Türe. Es isch no interessant zum luege, wie da i de letschte Jahrestage aube no sone Hektik ufchunnt u me viu aagspannti Lüt trifft. Es gäb no so viu zum mache, u si sige no niene......., heisst's de aube. De mues i gwüss chly schmunzle. Dr Heilig Aabe isch ja immer au Jahr am 24. Dezämber u d'Wiehnachte am 25. Es isch nid so, dass es "täsch bum" macht u vo hüt uf morn heisst, es isch Wiehnachte! U glych stresse sech d'Lüt geng wieder uf ds Nöie.... Henusode, es muess äuä eifach e so si. I ha verwiche grad es guets u passends Zitat gläse wo heisst:

"Gäbe es nicht die letzte Minute,

so würde nie etwas fertig!"

Gseit het das dr Mark Twain - isch no witzig oder meinet dr nid? :-).

Hoffemer, dass de itze aui Lüt Rueh u Friede finge u das Wiehnachtsfescht de o chöi gniesse. Ir Autjahreswuche cha me ja de ono chly es Resümé z'zieh, was für eim ds Jahr 2009 so aus bracht het. Da gits sicher e huufe Sache, wome villecht chly drüber cha schmunzle oder haut o, wo eim chly truurig stimme. Jede Mönsch het haut sys Burdeli z'trage, doch bini überzügt, das me dadrby nid überlade wird. Ds trage vo däm Burdeli het garantiert o si positivi Syte, me cha nämlech dranne erstache! U weme starch isch, treit me bekanntlich gwüssi Sache viu ringer!

I wünsche itze aune Lüt wo mi kenne, es wunderschöns Wiehnachtsfescht u vili interessanti u ruehigi Stunde i däm Umfäud wos ne wohl isch.........

Dr Näbel chunnt........

.....'s faht afa chalte, mir müesse abe mit em Veh.
Dr Winter wott bald Yzug halte, me gseht itz d'Sunne sälte meh."

So faht das Liedli aa, "Abschied vor Alp" vom unvergässene Bärner Jodler, Werner Zwahlen.

Näbu - das isch ganz öppis Eigenartigs aber glychzytig o Faszinierends. I has hüt ume däicht, woni so dür Näbu b'hangeni Gägende gfahre bi. Är chunnt ja meischtens uf lyse Sohle chy z'schlyche. Dert wo vorhär no e lüchtendi Farbepracht i de Wäuder z'gseh isch gsy, wird uf z'Mau alles gröitschelig u matt. Das Ganze überchunnt när sone "geischterhafti" Usstrahlig. Mi cha grad luege us förmlech gspüre, wie d'Stimmig wächslet - es isch ufne Wäg gfürchig schön. Bsungers schön fingeni so Näbelfäuder, wo übere Bode yschlyche oder weme höch ob überem Näbumeer cha d'Sunne gniesse.

Werum gits äch Näbu??? Auso mir isch scho klar, dass sech das physkalisch laht la erkläre. Mir isch da aber no öppis angers im Chopf. Chönnts äch nid so e Art Zeiche sy? Mir faut zum Bispiel uf, dass weme i Gebiet geit ga loufe wo dicke Näbu isch, es sehr, sehr ruehig isch u d Hektik wyt wäg isch. Söu dr Näbu üs villecht häufe chly abezfahre? Es chunnt mer fasch so vor, wie weme emene Chefig mit Wäuesittiche mit eme Tuech tuet abdecke, für das si de schwyge. Dr Näbu stiut üs o d'Wermi vor Sunne u laht üs la früüre. Isch das o e Hiwiis, das mer villecht ume chly dankbarer si, Sunne dörfe z'ha oder üs bewusst z'wärde was sy üs eigentlech bedütet? Dr Näbu stiut üs o d'Farbe u macht aues glych - grau u läär. O da chönnte mer chly drüber nachedänke.

I ha mi o scho gfragt, öbs äch i üs Mönsche o Näbu git? Blödi Frag, wärdet dir itze sicher däiche - aber es gits sicher. Es heisst eifach nid Näbu sondern Depression. O die schlycht sech a, nimmt eim d'Wermi, laht Farbe la erblasse u macht, das aus glych isch...........

Ja - es isch interessant, weme da chly drüber nachedänkt. Dr Näbu het aber o sys Guete. Mir gfauts zum Bischpiu so düre Näbu z'loufe u die füechti Luft yzschnufe. Mi tüechts aube, es tüeg eim grad düreputze. Oder o, wes chautet u sech dr Näbu de a de Böim u Strücher i Biecht umwandlet u so wunderschöni Landschaftsbiuder zouberet.

I wett mi "Näbu-Blog" abschliesse, mit emene Gedicht vom Hugo Salus

Mein Baum im Nebel

Von einem grauen Nebeltag befangen,
Liegt tot die Welt und war noch gestern klar.
Mein Häuschen ist mit Trauerflor umhangen
Und seine Augen trübt ein grauer Staar.

Mein Baum, der so vertraulich seine Hände
Zum Fenster mir gereicht, Freund, suchst du mich?
Nun tastest du wohl ängstlich an die Wände
Des grauen Hauses, ach, und fürchtest dich!

Ich will ein Lichtlein in mein Fenster stellen,
Damit du siehst, ich schick' dir Kunde zu,
Und daß du fühlst, wir sind im Grau Gesellen,
Und ich bin einsam, trüb und bang, wie du ...

Di grossi, wyti Wäut..........

I ha mir hüt ume einisch e Usflug ufe Flughafe Züri-Chlote gönnt. Ir Nechi vo Rümlang chame zimmli nach a d Startbahn ga luege, wie die grosse, schwäre Vögu mit emene zimmleche Getöse vor eim i d Luft göh. Es isch scho ydrücklech so emene A330 oder A340 zue zluege winer sech so langsam i d'Luft ueche zwängt. Obschons scho längschtens klar umschribe u erklärt isch - werum sones Rieseding i d'Luft chunnt - ischs haut glych immer no öppis, wo eim z'stuune macht. U ufene Wäg berüehrts einem o. Es drückt mer jedesmau chly ds Ougewasser füre, weni sone Start so nach darf mitverfouge.

Hüt isch vei chly öppis los gsy z' Chlote. I au Himusrichtige si si verstobe. Gäge Süde oder Weschte gstartet u när je nach Bestimmigslang e längzogeni Kurve drähit. Drwile si im Norde scho ume Flüger glandet. D'Air Canada isch hüt o vo Züri us abdüset u i ha ds Glück gha dä schlicht aber schön bemaut Flüger mit mire Camera yzfah.

Ja was wäre mir hüt ohni Flugzüg? Zuegäh, es hät äuä o öppis Guets. Mi wurd vermuetlech d'Ferie de o chly meh daheime im eigene Land verbringe. Da hets doch o hufe schöni Plätzli - oder nid? Aber es isch sicher usser Diskussion, das mir aui hüt Flugzüg aus Transportmittu vo A nach B bruche. U ds Flugi isch ja über d'Statistik betrachtet, immer no eis vo de sicherschte Transportmittu überhoupt. Aber o dr Luftruum wird nid immer grösser u villecht gits scho bau "Luftstou-Mäudige". :-) Henusode - es isch schön gsy hüt u es het mer guet ta das chly z'gschoue. I Gedanke hani so däicht, wo göh äch jitz di Lüt aui häre? Ja - das isch haut es Gheimnis blibe. Aber i bi sicher, si si i di grossi, wyti Wäut...........

E nöie Wäg.....

I dänke, das es nüt abwägigs isch, statt immer nume im bishärige Trott wyters z'gah, es mau e nöie, angere Wäg yzschlah. Genau das hani jitze im Sinn. So wie i däm Biud da links isch dr Wäg ir Nechi no rächt klar, aber je wyter hingere me luegt, desto unklarer wirds, wonär äch düregeit. U genau so ischs ja doch o i üsem Läbe. Me weiss ja nie vo Aafang ah was eim blüejt u was eim so aus begägnet ufeme Wäg.
Me chönnt us Bequemlechkeit oder villecht o chly us Angscht ja o eifach blibe stah u dä Wäg wo da vor eim ligt eifach nid beschritte. Das wär aber äuä o nid ds gäube vom Ei - oder? I ha mi jetzt uf jedefau entschlosse, e nöie Wäg zgah unes Kapitu i mim Läbesbuech mit dene Yträg hie im Blog abzschliesse. Es isch es Kapitu wo über zwänzg Jahr vo mim hütige Läbe prägt het. Zue gäh i bi i dere Zyt o starch gwachse u ryfer worde u glych bini itze sehr froh, das i dä Wäg - wo bau chly strube u steinige isch worde - cha verlah une nöie gah. Dänkt hanis zwar nid, das i scho jitze die Entscheidig muess träffe, woni wott düreluufe - aber d'Vernunft u mi Verstang hei mer gseit was ds Richtige isch. Uf äim Wäg hätt i sicher no e Unfau boue, so wie dä isch beschaffe gsy. Henu, entschiede isch entschiede u i bi jtze rächt froh drüber, dasi das gmacht ha. Es tüecht mi es sig ume vei e chly es gmüetlechs Wandere u was mi o sehr fröit, i cha ume gradus luege u gseh drdür d'Schönheit vor Natur. Das ewige müesse ufe Bode luege, dasi ob dene Chempe nid öppe no e Misstritt mache isch itze gottlob verby. Guet - i weiss ja de o nid wie lang dä Wäg woni itze gah, subere u passierbare isch. Viellecht gits o hie scho bau wider e Überraschig? Uf jede Fau han mer vorgnoh, d'Situation geng früsch aazluege u när z'entscheide was i wott. Sicher isch o, das i nieme uf dä aut Wäg zrügg wirde gah u drum isch dä Wägabschnitt itze gschlosse u im Kapittu hets bim letzte Satz es grosses PUNKT.

Woni hüt no chly dür ds schöne Ämmitau gschpaziert bi, bini amene Huus verby cho, wo zum Thema Wäg ono öppis schöns gschtange isch. Es hett gheisse:

" Es jedes wo da düregeit isch ungerwägs i d'Ewigkeit.
B'hüet di Gott bis lang no zwäg, chum wieder einisch dür dä Wäg."

Das hett mi no schön düecht, das z'läse. U für dä Wäg woni hüt glüffe bi, het das durchus zuetroffe. I hoffe i chöng ume eis dür dä Wäg gha. U wie gsehts uf öiem Wäg de so us?

No einisch e Geburtstag.......

Hüt chönnt mini Mam Geburri fyre. Weni e Chueche hät bache, hätti chönne 82 Cherzli druffe platziere. Aber äbe, es blibt leider bim hätti.... Syt 16 Jahr isch si nümme unger üs uf dere Wäut. O d Mam het - nach mim Verständnis - viu z'früech müesse gah. I meine weme öpper gärn het, isch es eigentlech immer z'früech u egau wie ds Alter isch. D Zyt geit enorm schnäu vorwärts u es tüecht eim aube fasch nid müglech, das me scho sone längi Zyt alleini fuehrwärchet. Aber es isch haut äbe so, jedi Minute wo abglüffe isch, chunnt e kes zwöits Mau verby - düre isch düre u das müesst üs eigentlech bewusster wärde!

I Situatione drnah bsinni mi aube gärn di gmeinsami Zyt mit dr Mam zrügg. Mir hei viu zäme ungernoh. We si de aube nid het furt wöue, de hani gstüpft u umgchert si. Mir heinis gägesytig motiviert u viu Luschtigs u Schöns zäme erläbt. Hüt fäuht mer das Stüpfe äbe chly.......

I weiss o no guet wo si mi i de Aafäng vo mire Dirigäntetätigkeit moralisch unterstützt het u weni ds Gfüeuh ha gha, es ging nid wyter, het si mer mit Tipps zwägghufe. Immer im Hingergrund isch si aktiv gsy, ohni irgend es Wäse drus z'mache. Si het mi o glehrt, sech säuber nid z'wichtig z'näh, sondern eifach z'diene, z'mache. D' Mam het das o so vorgläbt. Immer wes öppis z'mache het gäh, isch si zwäggsprunge. Sigs i üser Familie, bi ihrne Gschwischter oder früecher ono bi ihrer Mueter z'Oschtermundige. Aktiv si isch ihres Motto gsy u nach däm het si o gläbt. Die beide Hünd womer früecher no gha hei, dr Cocker Spaniel Wadgie u dr wyss Schäfer Tasso, hei ihre viu Freud gmacht. Si isch lydeschaftlech gärn mit em Tasso i d'Hundeschueu gange um ihm Ghorsam u o anger Sache z'lehre. Bi Wind u Wätter isch me mit dene treue Begleiter dusse gsy u het lengeri Spaziergäng gmacht. Mi Mueter isch o sehr öpper offnigs gsy. So het si di Reise zu mim Brüetsch uf Ouschtralie aube sehr gnosse u o im kulinarische Bereich (wie mes ufem Föteli cha gschoue) dr Horizont gärn erwyteret. Da isch si mir de um Viles vorus gsy :-).

Bsungers berüehrt hets mi, wo d Mam e Yladig usem ehemalige Ostdütschland zur Fyr vor "Goldige Konfirmation" het übercho u si gseit het, si wöu dert ga. Ostdütschland - ds Geburtsland vo mir Mueter - isch immer es Tabu gsy bi üs. Es haut äbe mit schlimme Erinnerige (dr 2. Wäutchrieg) verbunde gsy. Drum hets mi sehr gfröit, dass si nach vile vile Jahr übere Schatte gsprunge isch u wieder einisch a ihre Geburtsort zrügg het wöue. Das i mit ihm gah, isch denn für mi säubschtverständlech gsy. Im 1992 hei mer das de o realisiert. I bi beydruckt gsy, ob au däm wor mer het chönne verzeue über die Gägende. Es het i ihrem Geburtsort so gar no öpperen troffe, wos kennt het...... Es isch eifach ydrücklech gsy u das isch eim unger d'Hut.

D'Mam het i ihrem Läbe viu o für angeri Lüt, Hushautige oder Bürorüüm putzt. Sie isch auso aus Putzfrou ungerwägs gsy. Wie viu het me doch ghört - u ghörts o hüt no - die isch ja nume e Putzfrou .... Dr Pfarrer het a dr Abdankigsfyr vor Mueter öppis sehr ydrücklechs gseit.

"D' Putzfrou ruumt dr Dräck furt, damit mir üs am nächschte Morge ume im subere Umfäud chöi bewege. Si sorgt auso drfür, dass mir immer wieder e suberi Umgäbig hei, is wohlfüehle unis nid a ds Vergangene müsse erinnere. Wie dankbar sötte mir dere eifache Putzfrou doch eigentlech sy....."

Die Wort sy mir starch ygfahre, u i bi hüt no stouz uf mini Mam, dass si aube so viune Lüt e suberi Umgäbig gschänkt het.

Muotatal / Sz

Am Samschtig vor Bättag, hani d'Glägeheit übercho einisch i ds Muotatal chönne z'gah. I ha zwar nid vo Aafang aa gwüsst, das es dert häre geit. Es isch nämlech e Überraschigsfahrt - e Fahrt i ds Blaue gsy.

Me het ja scho viu ghört vo däm Muotatau u vor auem o vo de "Muotataler-Wätterschmöcker". Wie isch es äch dert, chame so ime änge Tau überhoupt läbe? Das si aus so Frage gsy, won mer gsteut ha u itz hani mau e erschte Yblick chönne übercho. Bim Mittagässe het e Yheimische Wätterschmöcker de verzeut uf was si so aues luege u wie si ds Wätter vorus prognoschtiziere. Är het o gseit, dass es me Merkmau / Indiz git e Prognose vo Schön nach Wüescht z'mache aus umgekehrt. Es isch luschtig u glychzytig o spanned gsy ihm zuezlose. Si luege zum Bischpiu uf d'Richtig vo Tannespitze, uf ds Trybe vo de Ameisi, uf d'Steine ob sy nass so oder nid, uf ds "Schwitze" vor Brunneröhre, uf Farbkonschtellatione im Näbu, usw. Woni das so aus ghöhrt ha, isch mer bewusst worde, dass d'Muotataler-Wätterschmöcker mit offete Ouge u Ohre dr ds Läbe göh u vili Sache gseh, wone grosse Teil vo üs chum me beachtet. Zue gäh, es isch für mi vermuetlech immer no eifacher Meteo im Fernseh z'luege aus öppe säuber wöue e Prognose z'wage. I bi aber beydruckt gsy vom Wüsse u vor Liebi zur Natur, wo di Wätterschmöcker üs vor Ouge gfüehrt hei.

Nam Mittagässe hani Glägeheit gha, dür ds Dorf Muotatal z'spatziere. Es isch schön gsy die "heili Wäut" chönne z'gniesse. Me isch hie furt vo Lärm u Hektik, me isch ybettet vo Feuswäng u cha vou abschaute. Es het viu auti Hüser, wo aber mit viu Liebi pflegt u gschmückt wärde. I Dorf säuber hei o chly moderneri Boute Yzug ghaute, dr gross Teil isch aber no nid modern. Chly schmunzle hani müesse ob au dene Wöschleine. Bi viune Hüser het me gseh, das so Drahtseili - vilecht öppe 10 m - vom Huus zume Pfoschte mit ere Umlänkroue gspannet sy. U so het me vom Huus us, chönne d'Wösch aahäiche u se när i "Dürzug" use seile. D'Wösch isch so natürlech de no grad is trochen.....

Es het natürlech de one "Wätterfrosch-Wanderwäg" u uf däm wärde uf so Tafele die einzelne Sache wo "Schmöcker" druf luege, erklärt.

Es isch e wunderschöne Yblick gsy woni i das Muotatal u sys Dorf ha dörfe übercho. I bi froh, dass i na au däm drvo Ghöre u geng eis wöue gah, itz einisch dert bi gsy. Für geng dert chönne z'Läbe wär i äuä nid gebore. I wirde aber sicher wieder eis e Abschtächer dert hi mache.......