Me mues es gseh......

Eigetlech müesst me ja gar nid so wyt fahre, für d'Schönheite vo üsem Land z'gseh. Wiu's hüt sone prächtige Tag isch gsy u ig ir nächschti nümme so wirde Zyt ha umezreise, hani hüt no eis e Usflug gmacht. Dadrby hani scho oberhaub vor Chäsi Schlattacker die wunderschöni Ussicht chönne gniesse:


D'Bärner-Alpe hei sech vo ihrer schönschte Syte zeigt. Es isch immer wider ydrücklech Eiger, Mönsch u Jungfrou so nach chönne z'gseh. Uf der Höchi bevors när abe gäge Radufinge, Utzige geit, isch no sones Bluemegärtli gsy. Dert hei Blueme i allne Farbe glüchtet u e jedi het sech für dä prächtig Tag useputzt. Es isch eifach super schön gsy, das chönne aazluege.

I bi när wyter Richtig Oschte gfahre. Ds Mägewil bini use u ha Lupfig, Windisch, Brugg aapeilet. Vo dert us bini när dür Dörfer cho, woni no nie mir Läbtig ghört ha. Da hetts Näme gha wie : Lauffohr; Stilli; Villingen. Mi Fahrt isch Richtig Döttingen - Koblenz - Rietheim gange. Alles schön dr Dütsche Gränze und em Rhyy nache. Dür das bini de o bim bekannte Ort Bad Zurzach verby cho. I ha bis itze immer nume drvo gläse oder ghört. Itze bini eis verby gfahre. Wyter verby a wunderschöne Gwächs- u Sunnebluemefäuder isch mi Fahrt nach Kaiserstuhl - Weiach gange. Der hani mi när entschiede uf Stadel z'fahre. Dert isch ja o dä bekannt Stadlerberg, wo am 14. Novämber 1990 e McDonnell Douglas DC-9-32 vo dr ALITALIA abgstürzt isch.

Uf z'Mau hanise när o gseh, die grosse Flüüger. Si hei sech ygreielet, für de z'Züri chönne z'lande. Churz vor Neerach hani ufem Fäud usse chönne parkiere u dene Flüüger i auer Rueh bim Lande zueluege - eine nachem angere isch cho. Hie zum Byschpiu d Air Berlin:

Es het aber no öpper angers sini Kreise ir Luft dräjit u immer ganz gierig ufe Bode ache gluegt - e Rotmilan. Es isch da sone früsche Emd-Bitz gsy u villecht seckelt öppe ds einte oder angere Müüsli desume, wird är däicht ha.

I binim äuä im Wäg gsy u drum het är du haut nüt zum z'Mittag übercho :-).
I ha ja o nüt gässe, sondern di ganz Zyt eifach beydruckt dene landende Flüüger zuegluegt. Ufene Muus hätti ja sowieso nid gluscht gha.

Ja - es isch ume ganz e interessante Tag gsy u me het sehr viu gseh. Viune Orte sy Buure am schaffe gsy, entweder mit ämde oder de hei sy ds Gwächs la drösche u sy am Stroh verrume gsy.

Weme so mit offfene Ouge dür üsi Landschaft fahrt, de gseht me wahnsinnig viu. Mir ischs ömu hüt so gange. Aber äbe - me mues es gseh....